TANZIA: MWANAMUZIKI MKONGWE WA DANSI KASSIM MAPILI AFARIKI DUNIA

Mwanamuziki mkongwe wa muziki dansi Kassim Mapili akicharaza nyuzi za Gitaa lake chini ya Kundi zima la Mjomba Band.

MWANAMUZIKI mkongwe wa muziki dansi Kassim Mapili amefariki dunia akiwa chumbani kwake, Tabata jijini Dar es Salaam. Katibu mkuu wa Chama cha Muziki wa Dansi (CHAMUDATA) Hassan Msumari, amesema kuwa kifo cha Mapili kimegunduliwa usiku huu baada ya mlango wa chumba chake kuvunjwa.
Mlango huo ulivunjwa baada ya Kassim Mapili kutoonekana tangu alipokwenda kutazama mpira wa Arsenal na Barcelona Jumanne usiku.
Kwa mujibu wa Msumari, mara mlango ulipovunjwa Kassim Mapili alionekana akiwa ameshafariki akiwa amejifunga taulo, ishara inayoonyesha kuwa aidha alikuwa anakwenda kukoga au ametoka kukoga.
Jumatatu jioni Kassim Mapili alishiriki vizuri mazishi ya mwanahabari Fred Mosha makaburi ya Kinondoni ambapo alipewa wasaa wa kuongea machache na kama vile hiyo haitoshi, Mapili aliimba makaburini hapo kuomboleza kifo cha Fred Mosha. (SOURCE: GLOBAL PUBLISHERS)

Mwanamuziki huyu atakumbukwa kwa baadhi ya nyimbo zake mashuhuri zilizokonga nyoyo ikiwemo 'Nataka nipate lau nafasi' na 'Rangi ya Chungwa'.
Kampuni ya Convida inatoa pole kwa familia, ndugu jamaa na rafiki wa marehemu baba yetu mpendwa mzee Kassim Mapili. (Mungu ailaze roho ya marehemu mahali pema peponi,Amina.)