TANZIA: MSANII MKONGWE WA KIZAZI KIPYA AFARIKI DUNIA

Msanii wa muziki wa kizazi kipya ambaye alijipatia umaarufu mkubwa kwa staili yake ya kuimba kama mlevi, Michael Dennis Mhina ‘Joni Woka’ amefariki dunia siku ya jumanne, alfajiri ya tarehe 16, Februari 2016.
Akiongea kwa simu kaka wa marehemu Omari Milay, amesema walipigiwa simu alfajiri hiyo ya tarehe 16 na kujulishwa kuwa Joni Woka amefariki katika hospitali ya Muhimbili, alipokuwa akipata matibabu ya ajali aliyopata siku ya jana.
Chanzo cha ajali hiyo kinasemekana kuwa ni kugongwa na kitu kizito kwenye paji la uso, alipokua garage maeneo ya sinza akitengeneza gari yake, kwa bahati mbaya mtungi wa gesi ukalipuka na moja ya vipande vya chuma chenye ncha kali kikamchoma kichwani.
Taarifa za madaktari zilisema wanahofia kuwa kipande hicho kilifika mbali kiasi kwamba damu ilikua inamwagikia kwenye ubongo.
Msanii John Woka ambaye alikua kwenye kundi la Watukutu Family, alijipatia umaarufu kwa nyimbo zake za Sophia, Baby gal, Sipendi kuona, Tanga kunani akiwa na kundi la Wagosi na nyinginezo.
CONVIDA FUNERAL HOME CO. LTD inatoa pole kwa familia, ndugu, jamaa na marafiki wa msanii John Woka. Mungu ailaze roho ya marehemu mahali pema peponi, Amina.